ქუთაისში, ავტოქარხნის დასახლებაში მცხოვრები კაჩმაზოვების ოჯახი შპს "ქართული ტრადიციები 2011"-ის ყოფილ ხელმძღვანელობას საგვარეულო საფლავის უკანონოდ გასხვისებაში ადანაშაულებს.
ოჯახმა ქუთაისის მერიის დაქვემდებარებაში მყოფი კომპანიის წინააღმდეგ სარჩელი სააპელაციო სასამართლოში გუშინ შეიტანა.
კაჩმაზოვების ოჯახმა შპს-ს წინააღმდეგ სარჩელი თავდაპირველად ქუთაისის სასამართლოში შეიტანა, სადაც მათი მოთხოვნა არ დაკმაყოფილდა.
როგორც ამირან კაჩმაზოვი ამბობს, 1988 წელს მათი ოჯახის სახელზე გაცემული საფლავის საკუთრებაში გადმოცემის დოკუმენტაცია, ქუთაისის სასამართლომ არ გაითვალისწინა და უსამართლო გადაწყვეტილება გამოიტანა.
"საქალაქო სასამართლოს მიერ გამოტანილი განაჩენის შემდეგ გამიჩნდა ეჭვი, რომ აქვს ადგილი კორუფციულ გარიგებას," - აცხადებს ამირან კაჩმაზოვი, რომელიც საქმის ხელახალ გამოძიებას და სასამართლო ექსპერტიზის დანიშვნას ითხოვს.
მისი ინფორმაციით, ოჯახმა საფლავის გასხვისების თაობაზე 2012 წელს, აღდგომის დღესასწაულზე შეიტყო. ამირან კაჩმაზოვის ინფორმაციით გასხვისებულ სასაფლაოზე მისი მშობლებია დასაფლავებული.
