ამერიკელი ცოლ-ქმრის მკვლელობაში ბრალდებული მწყემსის დედას არ სჯერა, რომ ეს მკვლელობა მისმა შვილმა ჩაიდინა. როგორც მან “ინტერპრესნიუსთან” საუბრისას განაცხადა, მის შვილს დანაშაული არ ჩაუდენია და აბრალებენ, მკვლელის ვინაობის დასადგენად კი იბრძოლებს.
“7 ივლისს მელაპარაკა, დამირეკა თვითონ. არაფერი ეტყობოდა საუბრის დროს, თუნდაც მღელვარება. ასეთი რაღაც მითხრა – დახოცილ ცოლ-ქმარს ეძებენო, მაგრამ არ ვიცი, ვინ არიანო. რაღაც ტრაგედია დატრიალდაო. არაფერი ვიცი მეტი. იმ დღის მერე მასთან არ მიკონტაქტია, ტელეფონი არ იჭერდა იქ. აქ კი ჩემ სახლთან პოლიცია აივლიდა-ჩაივლიდა, თითქოს მე მყავდა მკვლელი სახლში დამალული. ვაპირებ სასამართლოზე მისვლას და თუ ჩემ შვილს გამამტყუნებელ განაჩენს გამოუტანენ, გავასაჩივრებ იმიტომ, რომ მგონია, ეს ვიღაცის მიერ ჩადენილი მკვლელობაა და მას აბრალებენ. ასეთია ჩემი ვერსია. მაინც ვიპოვი დამნაშავეს, თუნდაც მიწაში ჩაძვრეს. მე არ ვმუშაობ და ჩემ არასრულწლოვან შვილებს ეს არჩენდა. სულ 6 შვილი მყავს. ჩემ მეუღლესაც იგივე ვერსია აქვს, რომ ამ ყველაფერს ჩემ შვილს აბრალებენ. მე დედა ვარ და შეიძლება ხელი დავაფარო, მაგრამ მეზობლები გეტყვიან მის დადებით თვისებებზე”, – განაცხადა მარტიაშვილმა.
