Mcvane.Ge თქვენი საწყისი გვერდი
მთავარი გვერდი ჩვენ შესახებ კონტაქტი რეკლამა
მთავარი გვერდი » ახალი ამბები » ახალი ამბები » "ვსვამდით, როცა თქვა, თავს მოვიკლავო, ვკითხე, რატომ - მეთქი და მიპასუხა, გოგო მოვკალიო"
loading...

"ვსვამდით, როცა თქვა, თავს მოვიკლავო, ვკითხე, რატომ - მეთქი და მიპასუხა, გოგო მოვკალიო"

სასამართლო დარბაზში ბადრაგის თანხლებით ხელბორკილებით შემოიყვანეს. სკამზე ჩამოჯდა, თავი დახარა და დარბაზისკენ არ გაუხედავს. ვეფხია ბაქრაძეს განსაკუთრებული სისასტიკით განზრახ მკვლელობაში ედება ბრალი. მის გვერდზე მისი მამიდაშვილი, თეიმურაზ ბაქრაძე იჯდა, რომელსაც პროკურატურა დანაშაულის შეუტყობინებლობაში სდებს ბრალს, შუახნის მამაკაცი, ლამის მთელი პროცესის განმავლობაში ტიროდა. სავსე დარბაზში მოსამართლე არსენ კალატოზიშვილი გამოჩნდა და სხდომაც დაიწყო.

"ვეფხია ბაქრაძე, დავიბადე 1972 წელს, ვცხოვრობ მცხეთის რაიონის სოფელ მუხათწყაროში", - თქვა ბრალდებულმა და სხვა განმარტება პროცესზე არ გაუკეთებია. მოსამართლემ განუმარტა, მისთვის წაყენებული ბრალი 16-დან 20 წლამდე ან უვადო პატიმრობას რომ ითვალისწინებს.

პროკურორმა იოსებ ხუციშვილმა ორივე ბრალდებულისთვის პატიმრობის შეფარდება მოითხოვა და საქმის გარემოებებზე ისაუბრა:

"ვეფხია ბაქრაძე და ნათელა (ნათია) გობაძე წლების განმავლობაში არარეგისტრირებულ ქორწინებაში იყვნენ. მათ შორის ხშირი იყო კონფლიქტები, ხშირად ფიზიკურად უსწორდებოდა მეუღლეს. იგი 2014 წელს გაასამართლეს...

ციხიდან გამოსვლის შემდეგაც ყველა გზით ცდილობდა აღედგინა მასთან ურთიერთობა და ნათელას ქალიშვილი, თამარ გამრეკელაშვილი ხელს უშლიდა მათ ურთიერთობას... ნათელა გობაძეს დაქირავებული ჰქონდა ბინა ბარნოვის ქუჩაზე. სწორედ იმ ბინაში 6 და 3 წლის შვილების თვალწინ თაკო გამრეკელაშვილს ვეფხია ბაქრაძემ დანით სხეულზე მრავლობითი დაზიანებები მიაყენა და ყელი გამოჭრა... ჩადენილია საზარელი დანაშაული...

აღსანიშნავია ერთი გარემოებაც, ნათელა გობაძეს მისი ეშინოდა და არც ერთი განცხადება პოლიციაში ძალადობაზე მას შეტანილი არ აქვს. როცა ის ბაქრაძემ ბათუმში სცემა, მაშინაც პოლიციისთვის არ მიუმართავს, პოლიცია მასთან მივიდა საავადმყოფოდან მიღებული შეტყობინების საფუძველზე", - თქვა პროცესზე პროკურორმა და ვეფხია ბაქრაძის დაპატიმრება მოითხოვა.

როგორც ირკვევა, ბრალდებულმა გამოძიებას ჩვენება მისცა და ის წაყენებულ ბრალდებას ნაწილობრივ აღიარებს. ვეფხია ბაქრაძე ირწმუნება, რომ თაკო ბავშვების თვალწინ არ მოუკლავს, თუმცა ამას კატეგორიულად არ ეთანხმება ბრალდება. ცნობილია, რომ ტრაგედიის დროს პატარები სახლში იყვნენ და სწორედ ბავშვების ტირილის ხმაზე შევიდნენ ბინაში იქ მეზობლები. როგორც ირკვევა, მკვლელობამდე ბაქრაძეს და გამრეკელაშვილს შორის შელაპარაკება იყო, ახალგაზრდა ქალი თურმე დახმარებას ითხოვდა, მეზობლები ამბობენ, რომ ქალის კივილი გაიგონეს, ამიტომ მივიდნენ იმ ბინაში და კარზე დააკაკუნეს. პროკურატურა ვარაუდობს, მეზობლები რომ არ გამოჩენილიყვნენ და ბაქრაძეს არ შეშინებოდა მათი, ის სახლსაც დაწვავდა და ასე შეეცდებოდა კვალის წაშლას.

ბრალდებული თავის ჩვენებაში აღნიშნავს, რომ ბინაში ბენზინი მიიტანა და ბენზინი დაასხა იმ ტანსაცმელს, რომელიც დანით დააზიანა. პროკურატურის თქმით, ყველა ტანსაცმელი რაც დაზიანებულია, ნათია გობაძის იყო. "ქალის და ბავშვების კივილის ხმა შემოესმათ მეზობლებს, მივიდნენ და კარზე დააკაკუნეს. ვეფხია ბაქრაძე მიხვდა რომ ამ ვითარებაში ადვილი არ იყო მტკიცებულებების განადგურება და გადაიფიქრა ცეცხლის წაკიდება".

პროკურატურა ადასტურებს, რომ შემთხვევის ადგილიდან ამოღებულია სითხე, სავარაუდოდ, ბენზინი, რომელსაც ექსპერტიზა უტარდება.

ვეფხია ბაქრაძის ადვოკატი ცდილობდა გაემართლებინა ბრალდებულის მიმალვა. ცნობილია, რომ მკვლელობის შემდეგ ის ფანჯრიდან გადახტა და გაიქცა. ამის შემდეგ თავის ნაქირავებ ბინაში, შინდისის ქუჩაზე მივიდა, ტანსაცმელი გამოიცვალა და წავიდა გარდაბნის რაიონის სოფელ თელეთში, მამიდაშვილის თეიმურაზ ბაქრაძის სახლში. სწორედ იქიდან აიყვანეს დამნაშავე.

ფოტო: თეიმურაზ ბაქრაძე


"ვსვამდით, როცა თქვა, თავს მოვიკლავო, ვკითხე, რატომ - მეთქი და მიპასუხა, გოგო მოვკალიო"


რაც შეეხება თეიმურაზ ბაქრაძეს, მას გამოძიება დანაშაულის შეუტყობინებლობას ედავება და წაყენებული ბრალი 4 წლამდე პატიმრობას ითვალისწინებს. მისი ადვოკატი არ დაეთანხმა პროკურატურას და 3000 ლარიანი გირაოს შეფარდება მოითხოვა.
"ჩემმა დასაცავმა აღიარა დანაშაული. პოლიციაში დარეკვისთანავე მივიდა, თანამშრომლობს. ნასამართლევი არ არის. მშრომელი ადამიანია. ცალი თვალით ბრმაა, აქვს ბრონქიალური ასთმა. მისთვის წაყენებული მუხლი ჯარიმასაც ითვალისწინებს და გთხოვთ შეუფარდოთ გირაო", - თქვა პროცესზე მისმა ადვოკატმა ვახტანგ აბესაძემ. თუმცა ამას არ დაეთანხმა პროკურატურა. როგორც გაირკვა, თეიმურაზ ბაქრაძემ სატელეფონო მიმოწერა წაშალა.

ჩვენი ინფორმაციით, დეტალური ჩვენება მისცა გამოძიებას თეიმურაზ ბაქრაძემ. ის სოფელში ცხოვრობს და მასთან მივიდა მკვლელობის შემდეგ მისი ბიძაშვილი.

თეიმურაზი ჩვენებაში ამბობს: "ვეფხიამ სასმლის მოტანა მთხოვა, ვსვამდით, როცა თქვა, თავს მივიკლავო, ვკითხე, რატომ - მეთქი და მიპასუხა, გოგო მოვკალიო..."
სწორედ ამიტომ ედავება დანაშაულის შეუტყობინებლობას მას გამოძიება. ჩვენ დავინტერესდით მესიჯის შინაარსით, რის წაშლასაც ედავება მას გამოძიება და როგორც შევიტყვეთ, სწორედ ამ მიმოწერით გაიგეს სამართალდამცავებმა დამნაშავის ადგილსამყოფელი.

ეტყობა პოლიციამ მოსმენაზე აიყვანა ვეფხია ბაქრაძის და მისი ნათესავების ტელეფონები. როგორც ირკვევა, თეიმურაზ ბაქრაძემ მას მერე, რაც მოისმინა, რომ ვეფხიას მკვლელობა ჰქონდა ჩადენილი, მესიჯი მისწერა ვეფხიას დას. შარში არ გამხვიოთ, ეს კაცი მომაშორეთ აქედანო. პოლიცია ამის შემდეგ დაადგა თავზე სახლში მყოფ ვეფხიას. ამ დროს მისი მამიდაშვილი საქონლის სამწყემსად იყო წასული, იქ დაურეკეს პოლიციელებმა და დაიბარეს განყოფილებაში, მან კი წაშალა მესიჯები.

თეიმურაზ ბაქრაძის ადვოკატები ახლა სააპელაციო სასამართლოში შეეცდებიან გაასაჩივრონ თეიმურაზ ბაქრაძის პატიმრობის საკითხი და გირაოს მოითხოვენ.

უკვე ცნობილია, რომ ნათია გობაძემ და ვეფხია ბაქრაძემ 30 მარტს ოფიციალურად დაარეგისტრირეს ქორწინება. ნათია გობაძე ამბობს, რომ ეს იძულებითი ნაბიჯი იყო "სამსახურში მივდიოდი, დამხვდა, მუქარით მანქანაში ჩამსვა და იძულებით წამიყვანა იუსტიციის სახლში. ვუთხარი, არ მინდა შენთან ხელის მოწერა-მეთქი. აბა რა გინდა, ყელი გამოგჭრაო? უფრო იმიტომ დავთანხმდი, რომ საზღვარგარეთ აპირებდა სამუშაოდ წასვლას, მეუბნებოდა ერთად წავიდეთო და ცოლ-ქმრის მოწმობა გვჭირდებაო. არ ვეწინააღმდეგებოდი, რადგან უფრო აგრესიული ხდებოდა... მე მაისის ბოლოს მაინც ვაპირებდი საზღვარგარეთ წასვლას და იქამდე ვაგროვებდი მტკიცებულებებს, რომ ეგ პოლიციისთვის ჩამებარებინა და ჩემი შვილები მშვიდად დამეტოვებინა..." - ამბობს მოკლულის დედა ნათია გობაძე.

თუმცა ამას არ ეთანხმება ბრალდებულის ქალიშვილი ლიკა ბაქრაძე. ის ამბობს, რომ ამით გობაძე თავის მართლებას ცდილობს და რეალურად მან შვილებს დაუმალა და ჩუმად მოაწერა ხელი. ის ამბობს, რომ მამამისი ჩადენილისთვის უნდა დაისაჯოს, თუმცა მთავარ კითხვაზე არ აქვს პასუხი, თუ რატომ მოკლა მამამისმა თაკო გამრეკელაშვილი.

"მამაჩემს შეწყალება ნათიამ დაუწერა, მამა ამბობდა, ნათია ციხეშიც მაკითხავდა და ფულებსაც მიგზავნიდა, მაგრამ არ უნდა თაკომ გაიგოსო. მერე ხელიც მოუწერიათ, ნათია ამას მალავდა შვილებთან, რადგან ისინი წინააღმდეგი იყვნენ და თურმე ხვდებოდნენ კიდეც ერთმანეთს. ტრაგედიის დილას გაუგია ეს ამბავი თაკოს, რომ მათ ხელი მოწერილი ჰქონდათ. დარწმუნებული ვარ თავის მართლებას შეეცდებოდა ნათია და ეტყოდა, ძალით მომაწერინა ხელიო და ალბათ ამიტომ წაიყვანა დედამისი პოლიციაში და დააწერინა განცხადება. არ ვიცი იქ რა მოხდა, შეიძლება მამაჩემი თაკოსთან სასაუბროდ მივიდა და შემოაკვდა. გამიზნულად ამას არ გააკეთებდა.

- ამბობენ, რომ სახლში ჩასაფრებული იყო...
- თუ ჩასაფრებული იყო შეიძლება იმიტომ, რომ აეხსნა ნათიას შვილებისთვის, ჩვენ ისევ ერთად ვართ და ერთად ყოფნა გვინდაო, ეს წესით იყო ნათიას გასაკეთებელი მაგრამ არ გააკეთა. საზღვარგარეთ აპირებდნენ წასვლას და ხელიც, სავარაუდოდ, ამიტომ მოაწერეს. მამას რაღაც გეგმები ჰქონდა. უნდოდა რუსეთის ვიზა გაეკეთებინა. მამიდაჩემი საზღვარგარეთ არის და მას ელაპარაკა მამაჩემი, რომ ერთად უნდოდათ მას და ნათიას წასვლა საზღვარგარეთ...

- როდიდან დაიძაბა თაკოს და მამათქვენს შორის ურთიერთობა?
- ნათია და მამაჩემი 2004 წლიდან ერთად იყვნენ, როცა გაიგო თაკომ ეს ამბავი, იმ დროიდან გააპროტესტა. თაკოს არ უნდოდა მისი დედის გვერდზე ვინმე რომ ყოფილიყო, მე ვიყავი მაშინ 16 წლის, თაკო უფრო პატარა. მამაჩემმა და ნათიამ ერთმანეთი რესტორანში გაიცნეს, სადაც ერთად მუშაობდნენ და მას მერე ერთად იყვნენ. მე ნათიას შვილებთან კარგი ურთიერთობა მქონდა და ღამეც ვრჩებოდი. ახლა სასამართლო პროცესზე ვუყურებდი მამაჩემს, მას კარგად ვიცნობ და ვხედავ როგორ განიცდის. ვინც ამ დარბაზში იჯდა, ის არის მამაჩემი, და არა ის, რომელმაც თაკო მოკლა. ფაქტია, რაღაცამ მიიყვანა იმ მდგომარეობამდე და ამ მიზეზის დადგენა მინდა და დარწმუნებული ვარ, ვიპოვი ამაზე პასუხს. დამნაშავე არის მამაჩემი და უნდა დაისაჯოს, მაგრამ მიზეზი ხომ უნდა გავიგოთ. ძალიან მშვიდი ადამიანი იყო, სულ ჩემს დაქალებთანაც იყო, რატომ გამოყავთ ასეთი "უჟასი", როცა თვითონ იციან, რომ ის ასეთი არ არის.

- არც თქვენ გინდოდათ მათი ერთად ყოფნა?
- იმ ამბების მერე, რაც მოხდა მაშინ, გინდ დედის გინდ მამის მხრიდან რომელ შვილს ესიამოვნებოდა მათი ერთად ყოფნა? - არავის. ეს კარგად იცოდნენ და აპირებდნენ ამიტომ წასვლას, მაგრამ გახმაურდა. ყველაზე მეტად მაინტერესებს რამ გადაუკეტა მამაჩემს ტვინი და რატომ ჩაიდინა ეს შემზარავი დანაშაული.

- ბათუმში, რომ ქვით თავი გაუტეხა, რა იყო კონფლიქტის მიზეზი?
- მიზეზი ეჭვიანობა იყო და ამის საფუძველი ჰქონდა. მაშინ არ დაუკავებიათ მამაჩემი, მაგრამ მერე მის მეგობარს მოუხდა ავარია, დანაშაულის დაფარვისთვის დააკავეს და ეს ძველი საქმეც გაუხსენეს და გაასამართლეს.

პროკურორი იოსებ ხუციშვილი ადასტურებს, რომ ბრალდებულმა გამოძიებას ჩვენება მისცა. მისი თქმით, კონფლიქტი თაკოსთან ბრალდებულს წინა დღესაც ჰქონდა. "ბრალდებული ნაწილობრივ ცნობს თავს დამნაშავედ. ყველა ის პირი, რომელიც მხილებული იქნება ძალადობრივი დანაშაულის ჩადენაში, დაისჯება უმკაცრესად. ერთ-ერთი ვერსიით, ის მკვლელობის შემდეგ კვალის დაფარვას ცდილობდა. აღმოჩენილია სახლში თხევადი ნივთიერება, ბრალდებულის განმარტებით ეს არის ბენზინი და ამბობს, რომ უნდა დაეწვა დაზარალებულის დედის ტანისამოსი და ნივთები. დადგენილია, რომ წინა საღამოს დაემუქრა მოკვლით. სატელეფონო კომუნიკაცია შედგა გარდაცვლილსა და ბრალდებულს შორის, რადგან გარდაცვლილი ხელს უშლიდა მათ ურთიერთობას. წინა დღეს ბრალდებული შეეხმიანა თავის მეუღლეს, მას ტელეფონი გამოართვა მისმა შვილმა და უთხრა ბაქრაძეს რომ დაშორებოდა და თავი დაენებებინა დედამისისთვის, სწორედ მაშინ დაემუქრა ბაქრაძე.

- მოკლულის დედა ამბობს, რომ ბრალდებულმა მას უთხრა შვილი რომ მოუკლა, ეს დასტურდება?
- გარდაცვლილს ჰქონდა დედამისის ტელეფონი, რადგან იმ ტელეფონში იყო ინტერნეტი. გაცვალეს ტელეფონები. დედამ რომ დარეკა თავისივე ტელეფონზე, ბრალდებულმა აიღო და რომ ჰკითხა, სად არის ჩემი შვილიო, უპასუხა, თაკო მიწაშიაო.

- ბევრი დაზიანება აქვს მოკლულს?
- მრავლობითი ჭრილობები აქვს სხეულის სხვადასხვა მიდამოში და მალე გახდება ცნობილი ექსპერტიზის დასკვნა. ამოღებულია ასევე სისხლიანი ტანსაცმელი და მკვლელობის იარაღი - დანა.

- ვეფხია ბაქრაძემ იცოდა, რომ მის წინააღმდეგ საჩივარი დაიწერა და ამიტომ ხომ არ იძია თაკოზე შური?
- პოლიციაში რომ წავიდნენ, იცოდა თუ არა, არ ვიცი, მაგრამ ფაქტია, პოლიციიდან დაურეკეს მას, მაგრამ ის ზარებს არ პასუხობდა.

როგორც ირკვევა, ბაქრაძეს პირველ მეუღლესთანაც ჰქონდა ოჯახური კონფლიქტები, მასთან ორი ქალიშვილი ჰყავს, მეუღლე მას 1995 წელს ამიტომ დაშორდა. მალე მეორედ დაოჯახდა და მეორე ცოლთანაც ერთი შვილი ჰყავს. ამბობენ, რომ მეორე ცოლიც ძალადობის გამო დაშორდა. ნათია გობაძე კი მისი მეოთხე ცოლი იყო.

საქმეზე გამოძიება გრძელდება. პროკურატურა ბრალის დამძიმებასაც არ გამორიცხავს.

თეა ხურცილავა

www.kvirispalitra.ge




კომენტარები




მსგავსი სიახლეები:
  • 25 წლის ქალის მკვლელობაში ბრალდებულის შვილი: მამაჩემი უმკაცრესად უნდა დაისა ...
  • "ვეფხია ბაქრაძე სისხლიანი ტანსაცმლით მივიდა ნათესავთან" - რა უთხრა მკვლელ ...
  • 25 წლის მოკლული გოგოს დედა ადასტურებს, რომ ყოფილი ქმრის შეწყალება მოითხოვა
  • "დამცინავად მითხრა - შენი შვილი უკვე მიწაშიაო..." - რას ყვება მოკლული 25 ...
  • „მკვლელი ჩემს თაკოს უთვალთვალებდა... ამ არაკაცმა სამი წლის ბავშვს აყურებინა ...
  •  

    ფოტო განწყობისათვის
    1-07-2018, 15:52
    "ამერიკის ყველაზე მოდური ბებია" - "ჩემი სტილი მინიმალისტური, პროვოკაციული და ავანგარდულია"
    15-06-2018, 12:37
    ესტონეთში ასე ტოვებენ ხილს კორპუსებში მცხოვრებლებისთვის
    5-06-2018, 08:07
    მეტროპოლიტენი, სადაც მატარებელი მემანქანის გარეშე მოძრაობს (ვიდეო)
    3-06-2018, 08:34
    "19 წლისა გავთხოვდი, განა აესე დაჯღანულ ვიყავ" - 105 წლის, გუდამაყრელი ბებოს სათხოვარი
    1-06-2018, 15:39
    თაკო ჭანუყვაძე: „ერთადერთი მსგავსება, რაც კეკესთან მაქვს, ჩაცმის სტილია…“
    24-05-2018, 11:53
    “ჯერ გამოკითხა მოხუცი პაციენტი და მერე ასე მოეფერა” – ემოციური ფოტო კლინიკიდან
    23-05-2018, 16:37
    სამეფო წყვილმა ქორწილის ოფიციალური ფოტოები გამოაქვეყნა

    ვიდეო კოლაჟი
    16-07-2018, 12:24
    „შე სამარცხვინო, მაიმუნო ქალო“ - თინა ბოკუჩავა პარლამენტში ეკა ბესელიას მიეჭრა - მდგომარეობის განსამუხტად ოპოზიციონერ დეპუტატთან ირაკლი კობახიძეც მივიდა (ვიდეო)
    9-07-2018, 08:32
    ამერიკელთა ოჯახის წევრების მკვლელობისთვის 19 წლის მწყემსს უვადო პატიმრობა ემუქრება
    8-07-2018, 11:00
    ოჯახური ძალადობის შემთხვევა საგარეჯოში
    5-07-2018, 18:14
    რუსთავში რძალ-დედამთილმა ნარკოტიკებით ინტოქსიკაცია მიიღო (ვიდეო)
    5-07-2018, 03:20
    ნიუ-იორკში პოლიციელები თავისუფლების ქანდაკებაზე ასული ქალის ჩამოყვანას 4 საათი ცდილობდნენ
    5-07-2018, 03:01
    21 წლის სტუდენტს ფიზიკურად ათამდე პირი გაუსწორდა
    2-07-2018, 14:12
    ვინ არის ედუარდ სააკაშვილის რჩეული, რომელიც ძალიან ჰგავს სანდრა რულოვსს (ფოტო, ვიდეო)

         
    News.Mcvane.Ge © 2013 საავტორო უფლებები დაცულია