ტალიის ქალაქ ამატრიჩეში, რომელიც გუშინდელი მიწისძვრის გამო ნანგრევებად იქცა, ახალი მიწისქვეშა ბიძგები დაფიქსირდა. ამის შესახებ ინფორმაციას „ბი-ბი-სი“-ს კორესპონდენტი შემთხვევის ადგილიდან იტყობინება.
ბოლო მონაცემებით, იტალიაში, მიწისძვრის შედეგად 250-მდე ადამიანი დაიღუპა, მათ შორის იყო რუმინეთის 2, ხოლო ესპანეთის 1 მოქალაქე. იტალიის ჯანდაცვის სამინისტროში არ გამორიცხავენ, რომ დაღუპულთა რიცხვი კიდევ უფრო გაიზრდება, რადგან ნანგრევების ქვეშ ათობით ადამიანია დარჩენილი.
ამჟამად სტიქიით დაზარალებულ ქალაქებში 5 000-მდე მაშველი და მოხალისე მუშაობს. სამაშველო ოპერაციაში, ასევე, სამხედროები, პოლიციის თანამშრომლები და საერთაშორისო ჰუმანიტარული ორგანიზაციების წევრები არიან ჩართული.
იტალიაში, 6,2 მაგნიტუდის მიწისძვრა ოთხშაბათს, ადგილობრივი დროით 03:36 საათზე მოხდა. ყველაზე მეტად ქალაქი ამატრიჩე დაზარალდა, სადაც შენობების ¾ ნანგრევებად იქცა.
